ചരിത്രപ്രസിദ്ധമായ 'ബോർഡർ റോഡ് അടയ്ക്കുന്നു; അമേരിക്കയുടെ തീരുമാനത്തിനെതിരെ കാനഡയിൽ പ്രതിഷേധം

കാനഡയെയും അമേരിക്കയെയും തമ്മിൽ ബന്ധിപ്പിക്കുന്ന ചരിത്രപ്രസിദ്ധമായ 'ബോർഡർ റോഡ്' അടച്ചുപൂട്ടാനുള്ള അമേരിക്കൻ സർക്കാരിൻ്റെ തീരുമാനം അതിർത്തി ഗ്രാമങ്ങളിൽ വലിയ പ്രതിഷേധത്തിന് ഇടയാക്കുന്നു. കാനഡയിലെ ആൽബർട്ടയും അമേരിക്കയിലെ മൊണ്ടാനയും തമ്മിൽ ബന്ധിപ്പിക്കുന്ന 14 കിലോമീറ്റർ ദൈർഘ്യമുള്ള ഈ പാത പതിറ്റാണ്ടുകളായി ഇരുരാജ്യങ്ങളിലെയും ജനങ്ങൾ ഒരുപോലെ ഉപയോഗിച്ചു വരികയായിരുന്നു.

വേർതിരിവുകളില്ലാതെ കുട്ടികൾ കളിച്ചു വളർന്ന ഈ പാതയിലെ ഗാഢമായ സൗഹൃദത്തെക്കുറിച്ച് 1990-ൽ നാഷണൽ ജിയോഗ്രാഫിക് മാഗസിൻ ഫീച്ചർ ചെയ്തിരുന്നു. എന്നാൽ, അനധികൃതമായി അതിർത്തി കടക്കുന്നത് തടയാൻ എന്ന പേരിൽ ഈ വേനൽക്കാലം മുതൽ പാത അടയ്ക്കാനാണ് അമേരിക്കൻ അധികൃതരുടെ തീരുമാനം. തങ്ങൾ ഇതുവരെ അത്തരം നിയമലംഘനങ്ങൾ കണ്ടിട്ടില്ലെന്ന് പ്രദേശവാസികൾ വ്യക്തമാക്കുന്നു.

ഈ സാഹചര്യത്തിൽ, പ്രാദേശിക യാത്രാസൗകര്യം ഉറപ്പാക്കുന്നതിനായി അമേരിക്കൻ റോഡിന് സമാന്തരമായി സ്വന്തം അതിർത്തിയിൽ പുതിയ റോഡ് നിർമ്മിക്കാൻ ആൽബർട്ട സർക്കാർ തീരുമാനിച്ചു. എട്ട് മില്യൺ ഡോളർ ചെലവഴിച്ചാണ് കാനഡ പുതിയ റോഡ് പണിയുന്നത്. അമേരിക്കയുടെ ഈ കർശന നിലപാട് അതിർത്തിയിലെ ജനങ്ങളുടെ ദൈനംദിന ജീവിതത്തെയും കാലങ്ങളായുള്ള അയൽപക്ക സൗഹൃദത്തെയും ബാധിക്കുമെന്ന ആശങ്കയിലാണ് ജനങ്ങൾ.